UM VERKIÐ: Við kynnumst Lárusi. Hann er ljótur. Svo ljótur að honum er meinað að fara á ráðstefnu á vegum fyrirtækisins. Sú ákvörðun kemur Lárusi algerlega í opna skjöldu og þegar vinnufélagar hans og eiginkona segjast skilja afstöðu fyrirtækisins fullkomlega tekur hann ákvörðun sem gjörbreytir lífi hans – og útliti. Hvernig má það vera í nútímasamfélagi að einstaklingur þyki hreinlega svo óheppinn í framan að hann fær ekki einu sinni að halda fyrirlestur? Hvað gerir maður sem vekur viðbjóð og andstyggð með nærveru sinni einni til þess að falla í kramið og fá að vera með? Þetta leikrit Mariusar von Mayenburg er frábærlega skrifuð gamansöm ádeila á ímyndarsköpun, yfirborðsmennsku og dómhörku venjulegs fólks. Hópurinn fer hráa og umbúðalausa leið að þessu hárbeitta verki og skapar úr því eftirminnilega sýningu þar sem list leikarans er í fyrirrúmi.